Art & Music Bilboko Guggenheimean
Otsailetik aurrera, Guggenheim Bilbao Museoko Atrioa zuzeneko musikaz blai izango da Kutxabank babesle duen Art & Music programaren edizio berriari esker. Martxoa eta ekaina bitartean, hiru kontzertu eskainiko zaizkio publikoari proposamen moderno eta garaikide batez goza dezan, Museoaren ildo artistikoarekin eta bere arkitekturarekin bat.
Maria Jose Llergo izango da emanaldia eskainiko duen lehena, martxoaren 8an, larunbatean, eta ondoren Charlie Cunningham arituko da, apirilaren 5ean, larunbatean. Yerai Cortesek, bakarkako formatuan, emango dio amaiera zikloari maiatzaren 10ean, larunbata. Hiru proposamenak flamenkoan inspiratuta daude, baina generoa oso modu ezberdinean lantzen dute.
Art & Music programari esker, kontzertuetara doazenek erakusketak ikusi ahal izango dituzte aretoan petit comité-an 20:30etik, emanaldiak hasi baino lehen, 22:00etan, eta Museoak Atrioan bertan gaitzen duen taberna-zerbitzua erabili ahal izango dute edari eta pintxoekin (sarreraren prezioan sartzen ez diren kontsumizioak).
